Санорин 0,1% 10 мл спрей назальный

Сипаттама

Дәрілік затты медициналық қолдану жөніндегі нұсқаулық

САНОРИН

Саудалық атауы

Санорин

Халықаралық патенттелмеген атауы

Нафазолин

Дәрілік түрі

Мұрынға арналған спрей, 0.1%

Құрамы

10 мл препараттың құрамында

белсенді зат: 0,010 г нафазолин нитраты

қосымша заттар: бор қышқылы, метилпарагидроксибензоат, этилендиамин, тазартылған су.

Сипаттамасы

Иісі жоқ түссіз мөлдір сұйықтық

Фармакотерапиялық тобы

Мұрынға арналған препараттар. Антиконгестанттар және жергілікті қолдану үшін мұрынға арналған басқа да препараттар. Симпатомиметиктер. Нафазолин.

АТХ коды R01AA08

Фармакологиялық касиеттері

Фармакокинетикасы

Жергілікті қолданғанда тамырды тарылтатын әсері 5-10 минуттан соң басталады және 2-ден 6 сағатқа дейін жалғасады. Жүйелі қан ағымына сіңіріледі және жүйелі әсер беруі мүмкін.

Фармакодинамикасы

Санориннің құрамында альфа-адренорецепторларға әсер етуші жүйелі симпатомиметик болып табылатын нафазолин бар. Шырышты қабықтың тамырларына айқын және ұзақ уақытқа жалғасатын тамыр тарылтқыш әсер береді. Интраназальді қолданған кезде нафазолин тамырларды тарылтады, эссудацияныазайтады, осылайша мұрынмен дем алуды жеңілдетеді және жоғарғы тыныс жолдарының қабынуы кезінде шырышты қабықтың ісінуін азайтады.

Қолданылуы

- мұрынның бітелуін жеңілдету үшін

- жедел ринитте

- синуситте

- диагностикалық және емдік араласулар кезінде мұрынның шырышты қабығының ісінуін басу үшін

Қолдану тәсілі мен дозалары

Ересектергежәне 15 жастан үлкен жасөспірімдерге.

6 сағаттан кем болмайтындай аралықта, күніне 3 рет әр мұрын қуысына 1-3 бүрку керек.

3 күннен артық қолданбау керек. Қайталап қолданар алдында бірнеше күн үзіліс жасау қажет.

Спрейді алғаш қолданар алдында аэрозолдың шағын бұлтшасы пайда болғанша дозалаушы құрылғыны бірнеше рет басу керек. Тікелей қолданар алдында қорғаныш қақпақшасын алып, препараты бар құтыны тігінен ұстау керек, дозалаушы құрылғының ұшын әрбір мұрын қуысына енгізеді де, аппликаторды жылдам және бірден басады. Бүріккеннен кейін бірден мұрынмен жеңіл тыныс алу қажет. Препаратты қолданудан кейін аппликаторды қорғаныш қақпақшасымен жабу керек.

Жағымсыз әсерлері

Ұсынылған дозаларда қолданғанда препарат әдетте жақсы көтерімді.

Сирек:

• жүрек айнуы, бас ауыруы, күйгелектік, тремор
• тахикардия, артериялық қысымның көтерілуі, жүрек қағуы
• реактивті гиперемия, қатты тершеңдік
• шымылдатып ашытуды сезіну немесе мұрынның құрғауы
• мұрын қуысы шырышты қабығының ісінуі (7 күннен артық қолданғанда)
• атрофиялық ринит
• препарат әсері азайғаннан кейін мұрынның қатты бітелуі
• жүктілік және лактация кезеңі (тек жедел қажеттілік жағдайда, қатаң түрде дәрігердің тағайындауы бойынша)

Өте сирек

Тым жиі қолдану қолданудан кейінгі салыстырмалы түрде қысқа уақыт ішінде болатын шырышты қабықтың қатты ісінуімен қатар жүретін тәуелділікке әкелуі мүмкін.

Препаратты ұзақ уақыт бойы қолдану шырышты қабық эпителийдің бұзылуына, цилиарлық қызметтің тежелуіне және шырышты қабықтың зақымдануының қайтымсыз болуына және құрғақ риниттің дамуына әкелуі мүмкін.

Қолдануға болмайтын жағдайлар

- препарат компоненттеріне жоғары сезімталдық

- артериялық гипертония, тахикардия, айқын атеросклероз

- көздің ауыр аурулары

- гипертиреоидизм

- несеп шығуының бұзылуы

- қант диабеті

- жабықбұрышты глаукома

- қуықасты безінің ауруы

- құрғақ ринит

- созылмалы ринит (атрофиялық типі)

- 15 жасқа дейінгі балалар

Сақтықпен

Дәрілермен өзара әрекеттесуі

Препаратты моноаминооксидаза тежегіштерімен немесе трициклдік антидепрессанттармен және мапротилинмен бір мезгілде қолданбаған дұрыс, өйткені жүрек ырғағы бұзылуы және қан қысымының жоғарылауы мүмкін.

Айрықша нұсқаулар

Препаратты жүрек-қантамыр жүйесінің ауруы (гипертония, жүректің ишемиялық ауруы) кезінде, феохромоцитома немесе әлеуетті гипертензиялық препараттармен өте сақтықпен тағайындау керек.

Ұзақ қолданған кезде айқын тамыр тарылтқыш әсері (тахифилаксия құбылысы) біртіндеп төмендейді, осыған байланысты препаратты 3 күннен артық қолдану ұсынылмайды. Ұсынылған дозадан асырмау керек.

Анестетиктердің көмегімен жүргізілетін жалпы наркоз уақытында абай болу керек, олбронх демікпесі бар науқастарда симпатомиметикке (мысалы галотан) миокард сезімталдығын жоғарылатады.

Ұзақ қолданылуын және артық дозалануын болдырмау керек. Шырышты қабықтың ісінуін басуға арналған дәрілік затты ұзақ қолдану ісінуге және мұрын шырышты қабығының салдарлы атрофиясына әкелуі мүмкін.

Осы дәрілік заттың құрамында метилпарабен бар, ол аллергиялық реакцияны (мүмкін, баяулаған типті) туындатуы мүмкін.

Жүктілік және лактация кезеңі

Нафазолиннің плацента арқылы өтетін және емшек сүтінен бөлінетін қабілеті жөнінде ақпарат жеткіліксіз. Сондықтан препараттың жүкті немесе емшек емізетін әйелдерге енгізуге дейін емдеу артықшылығы мен зор қауіптілігін қарастыру, препаратты тек өте қажеттілік жағдайда ғана тағайындау керек.

Дәрілік заттың көлік құралдарын және қауіптілігі зор механизмдерді басқару қабілетіне ықпал ету ерекшеліктері

Препарат көлік құралдарын және қауіптілігі зор механизмдерді басқару қабілетіне әсер етпейді.

Артық дозалануы

Симптомдары: препаратты байқаусызда қолдану күйгелектік, қатты тершеңдік, бас ауыруы, тремор, тахикардия, пальпитация немесе гипертония сияқты жүйелі жағымсыз реакциялардың пайда болуына әкелуі мүмкін. Артық дозалану симптомдары жүрек айнумен, цианозбен, қызбамен, құрысулармен, жүректің тоқтауымен, өкпенің ісінуімен және тыныс алу немесе психикалық проблемалармен көрініс беруі мүмкін. Одан басқа да ұйқышылдық, дене температурасының төмендеуі, брадикардия, тер бөлінуі, шокка ұқсас гипотензия, апноэ немесе кома қатар жүретін орталық жүйке жүйесінің бәсеңдеуін байқауға болады.

Емі: симптоматикалық.

Балаларда жағымсыз әсерлерге сезімтал келетіндіктен ересектерге қарағанда артық дозалану қаупі жоғары.

Шығарылу түрі және қаптамасы

Жиынтықта механикалық дозалаушы бүріккіші мен қорғаныш қалпақшасы бар жоғары тығыздықтағы ақ полиэтиленнен жасалған құтыда 10 мл-ден.

1 құтыдан мемлекеттік және орыс тілдеріндегі медициналық қолдану жөніндегі нұсқаулықпен бірге картон қорапқа салады.

Сақтау шарттары

Жарықтан қорғалған жерде, 25ºС-ден аспайтын температурада сақтау керек.

Мұздатып қатыруға болмайды!

Балалардың қолы жетпейтін жерде сақтау керек!

Сақтау мерзімі

4 жыл

Қаптаманы ашқаннан кейін - 28 күннен аспау керек.

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецептісіз

Өндіруші

«Teva Czech Industries s.r.o.», Чех Республикасы

«Тева Чех Кәсіпорны с.р.о.», Чех Республикасы

Тіркеу куәлігінің иесі

Ксантис Фарма Лтд., Кипр

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы

«Xantis Pharma (Ксантис Фарма)» ЖШС, Қазақстан

050008 Қазақстан, Алматы қ-сы, Әуезов көшесі, 48, 3 қабат, 3/2 кеңсе.

Телефон, факс: +7 (727) 344 93 14

e-mail: info.kz@xantispharma.com info.kz@xantispharma.com

Қалалар